你願意為愛嘅人付出幾多？真愛何價？
陳貝兒主持大台真人騷《嫁到這世界邊端 2》前三集講咗兩位韓國人妻嘅故事，都係韓國Oppa為老婆付出好多。但今晚一集講瑞典人妻Molly（毛毛）同設計師老公Johan嘅故仔，就係調番轉，妻子為丈夫付出一切。
港女毛毛係單親媽媽，一次緣份安排下，喺香港認識咗來自瑞典鄉下嘅窮小子Johan，一拍即合。婚後Johan留港，但男方工作未如理想，一直失業，毛毛無私付出，對Johan照顧有嘉，寧願自己做sales撐起頭家，亦從來冇問老公攞家用。及至有一次去超巿shopping，Johan突然拎咗張信用卡付款，驚喜宣佈已經搵到工，有收入，毛毛就覺得好感動。
毛毛一「包」就「包」咗老公十年，人生冇幾多個十年，期間毛毛受盡親友冷言冷語，Johan甚至被背後笑「食軟飯」，好彩毛毛都冇動搖，佢願意喺呢場愛情賭博下重注。兩人結婚十五年，一年前Johan帶咗毛毛返瑞典定居，仲喺老家搵到份好工，喺大公司做設計，亦承諾一定會好好照顧老婆，等佢唔使再捱。
貝兒都受毛毛愛情故事感動，至於會否效法？佢回覆傳媒時就話：「愛唔係用錢嚟衡量嘅，如果我有能力都唔介意付出多啲。」
(蘋果日報)
