內地女星范冰冰上星期承認逃稅，被中國稅務總局罰款8.4億人仔，仲搞到同男友李晨嘅半億世紀婚禮撻Q收場，不過好在李晨依然不離不棄，仲示愛冰冰話「咱們一起渡過去」，真係Sweet到爆。
男友出晒面力撐，潛咗水嘅冰冰除咗發認罪聲明，佢都係唔見影。
一路去到尋晚（7日）11點幾，佢終於都喺微博發聲，神神秘秘咁喺自己嘅超話（Hashtag話題）入面留言，連佢自己微博page都搵唔到，仲非常真摰地向佢嘅粉絲寫道：「感受到你們的心心念念！想你們！[心]」嘩，潛水多日嘅冰冰一「現身」就話掛住粉絲，咁情深寵粉，唔怪得之佢出事以嚟，粉絲們都繼續追隨力撐，落力程度真係媲美男友李晨咁痴心！
另網上瘋傳冰冰兩日就籌到錢交8.4億罰款，仲配文附上一段聲稱係冰冰現身稅務局嘅短片，片長僅6秒，片中見到冰冰身穿運動裝行出建築物，一個箭步行上車走人，身旁有保鑣護駕。
不過冰冰有關方面就即刻出嚟澄清，指「已交罰款」一說係隨口造謠，加上稅務局國慶期間放假，所以傳言係不實，而「現身稅務局」嘅短片其實係冰冰2016年在烏魯木齊參加活動所拍攝嘅。
(on.cc東網)
