天后王菲與李亞鵬所生嘅愛女李嫣一向都熱愛社交網，早年佢就玩微博意外曝光大宅同阿媽嘅衣帽間，加上佢不斷晒自拍、晒靚衫，搞到老竇李亞鵬要出面喝停，仲落order要Del post同account，不過咁都阻止唔到李嫣嘅少女心，久唔久就會見到佢再晒自拍。
自己Account唔晒得，李嫣就「轉攻」閨蜜社交網，近日有網友就大爆李嫣Best friend嘅post，當然就唔少得閨蜜同李嫣嘅合照，仲有唔少佢哋平日嘅生活動態，連佢哋齊齊去王菲嘅騷《幻樂之城》後台、同「大美人」關之琳飯局嘅相都有，真係要咩相有咩相。
而晒李嫣相嘅閨蜜就有汪峰囡囡「小蘋果」（汪曼熙）同另一個被指係「白富美」嘅女仔等。本來兩個星二代有互動唔出奇，不過網友見到佢哋啲相基本上都係去名店濕平，更有人傳佢哋行街買嘢兩個鐘，就使咗成10萬！
早前李嫣（中）就被拍得同阿媽王菲（左一）行街，大晒長腿。
(on.cc東網)
