陳貝兒去年主持大台節目《嫁到這世界邊端》，出埠找尋異鄉人妻愛的故事，佢聽完都好感動，今晚《嫁到這世界邊端2》首播，頭三集係講兩名嫁到韓國港女嘅故事。
大部份港女都迷睇韓劇，今晚第一個韓國新抱秋仔，佢嘅真人真事比韓劇仲催淚，港女秋仔同韓國電子工程師暢勇一段生死戀，阿秋突然發現自己患上急性腎衰竭，徘徊喺生死邊緣，但偏偏呢個絕望時候，佢遇上命中註定嘅韓國oppa暢勇，暢勇對住瞓喺醫院病床全身插喉嘅阿秋承諾：「只要你努力堅強好番，我哋就結婚，等我帶你一齊返韓國生活養病，我會照顧你，我哋一定會幸福嘅！」秋仔就憑暢勇一番鼓勵，戰勝病魔，oppa暢勇唔理父母反對娶咗病妻，陪佢接受治療，佢哋一齊搬咗去首爾鄉郊定居。
另一名韓國人妻Joan婚前一直喺香港一間航空公司做文職工作，因為睇咗韓劇《來自星星的你》，迷戀「都敏俊」金秀賢，追星到韓國，佢冇諗過睇完金秀賢演唱會散場，截的士返酒店，坐上韓國老公Tom嘅愛心的士，呢段婚姻係無心插柳柳成蔭，當時喺的士，Tom遞上自己卡片，佢哋就係咁開始咗一段異地戀，當然Tom同金秀賢個樣相差十萬八千里，佢反而有啲似大叔版金鐘國，佢哋交往後，Joan先知40歲嘅Tom有車、有樓仲有肌肉，係真正「筍盤」，偏偏佢對同鄉韓妹冇興趣，但對Joan一見鍾情。Tom單身時係自己住蝸居，娶咗Joan想佢生活好啲，佢晏晝揸的士，周末就做包車遊首爾，辛苦搲銀儲錢買千呎愛巢，依家佢哋結婚3年，仲係好sweet。
呢兩個韓國人妻古仔都好戲劇性，貝兒今日回覆傳媒時話：「佢哋都係真人版韓劇劇情，秋仔係《藍色生死戀》，我睇到佢哋好感動，流咗一公升眼淚，而Tom對Joan好好，令我睇到韓國男仔溫柔體貼一面。」貝兒笑言下次去首爾搭的士，都要認真留意下有冇「的士情緣」。
(蘋果日報)
