《2018亞洲小姐競選》香港賽區決賽嘅冠亞季軍，之後都可以代表香港參加喺馬六甲嘅總選，香港賽區總決賽只係用咗個半鐘左右，就分到勝負，一開場時已得到ig人氣大獎嘅9號李芷菱，雖然喺問答環節中俾評判之一嘅志雲大師狂窒，不過其後佢就得到「最上鏡小姐」。
至於曾經參選過今年香港小姐，但最終冇入圍嘅2號梁雪瑤，就成為今屆亞姐冠軍，而亞軍則係4號張右雨、季軍為10號林孜沫。而當宣佈嗰刻，2號梁雪瑤表現得頗為愕然，至於10號的林孜沫，就顯得有啲失望。
冠軍梁雪瑤返到後台受訪，當問到有否想過得冠軍，她回答說：「事前冇諗過嘅，只係想享受比賽舞台啫，不過都有諗過入三甲嘅，攞到冠軍有驚喜。（覺唔覺得自己爆冷？）又未至於，我有，身高優勢，而且對自己嘅表現滿意，有信心。（慶幸問答環節遇到嘅唔係陳志雲？）都係，不過其實個個佳麗都答得好好，我就比較自然啲。我最滿意自己跳舞嘅表現，因為唔係成日跳，所以好努力去學習及記舞步。（宣布咗最上鏡小姐後擔心自己冇奬？）又唔會，未頒三甲，仲有希望。我覺得自己可以再上鏡啲，而且真人靚過上鏡。」
亞軍張右雨受訪時，問到係咪問答環節拎咗好高分？佢話：「唔覺得，反而係返到後台表演唔係咁好，亞姐俾人感覺斯文，但我答問題郁嚟郁去，儀態係零分。」但志雲都讚你喎，佢就大方講：「錯有錯着，係好好反應traning，唔知自己講咗啲咩，唔知大家點解會笑。」佢又讚冠軍斯文，反而自己跳跳紮。
來自大陸嘅季軍10號林孜沫受訪時否認宣佈一刻覺得愕然，佢解釋：「我聽咗好耐，係咪叫我個名。進入三甲就最好，唔一定係冠軍就最好。」佢又讚冠軍梁雪瑤佢身材好好：「連女仔都好羨慕佢咁修長，未來我哋係一個團隊加油。」至於未來佢會留喺香港：「香港俾咗好多freedom我發展。」
（蘋果日報/on.cc東網）
