胡鴻鈞接受傳媒訪問，佢話最初以為消防員檢查防火設備，佢話：「直到工作人員話樓下火燭要走火警，大家先知事態嚴重，拎住隨身物品就衝落樓。見到消防員係後樓梯搭晒喉，又叫我哋行另一邊，但其實係冇另一條樓梯，好彩大家都安全落到地下，有驚無險。」
胡鴻鈞話全程都見唔到火種，只係有大量濃煙，由於當時好少女仔，所以下意識都會幫手照顧大家。佢仲話事隔兩日，同劇嘅另一組拍外景時又遇見火警，佢苦笑話：「台前幕後都講笑話咁火，套劇播出時一定好火。」
胡鴻鈞第一次擔正做男主角嘅《救妻同學會》最近接連遇到火警意外。前日凌晨12時許，胡鴻鈞與朱智賢、劉溫馨、蔚雨芯喺新蒲崗一棟工廠大廈內拍攝，突然聽到有人大嗌「走火警」，眾人即慌忙逃生！
胡鴻鈞、劉溫馨等都有喺ig上載短片，見到佢哋落到地面一刻，大家都有互報平安，見胡鴻鈞仲好man咁幫女同事拎手袋，劉溫馨一頭亂髮，而朱智賢更一身睡衣look逃走，頗為狼狽。
該場拍攝嘅場口，原本係劉溫馨同朱智賢嘅宿舍，所以佢哋全部換晒睡衣。而劉溫馨嘅睡衣就係一件恐龍衫，由於太笨拙，佢擔心阻礙逃生，所以係極速時間換咗便服，佢話：「我哋喺9樓行落去，好彩唔係太高，亦冇人受傷。聽講樓下有迷你倉，唔知係唔係，但之前有迷你倉著火好嚴重。咁人生亦係第一次遇火警，當時真係心跳加快，有啲驚。」
(蘋果日報)
