佢話生完產房姑娘仲讚佢：「佢話我真係生得好Elegant! 好多太太去到最後痛到失晒控，完全聽唔指令！我可以聽到指令，跟住做之餘，仲好冷靜咁教陪產嘅老公一陣幫手扶住邊度。不過，做母乳媽媽真係好偉大同唔容易，BB出世呢幾日，我喊咗幾次，感到好無助，好彩咁啱姑娘巡房見到，幫我推走BB一陣俾我瞓下，所以好多朋友，好似威仔都有msg我，但我一個都無覆，今日阿B終於正式出院，放心晒！可以同所有朋友分享喜訊！」
六合彩之子出世啦！講緊嘅當然唔係蔡國威，而係主持六合彩3年嘅舞台劇演員蔡運華。蔡運華同舞台劇工作者陳彥聰老公結婚3年一直恨生BB，結果今年初成功懷孕，而B仔已經喺今個月2日順利出世，重7.2磅。
蔡運華今日接受《蘋果》訪問時話:「10月1日踏正12點見紅，以為做到國慶寶寶，結果，10月2日早上10點幾先生到！經歷34小時先順利出世！為咗BB健康，連止痛針都無打，真正經歷女人最痛！」
蔡運華要特別多謝佢好姐妹劉雅麗Alice:「因為我生完拉傷大腿肌肉，唔係好行到，佢呢幾日日日standby，隨時嚟接我出院，車我去治療腳傷，仲陪埋我番上唐九樓屋企！呢啲好朋友去邊度搵！勁感動！呢個星期完全理唔到自己，好彩已安排紮肚療程快啲修身，因為坐完月就要開工，排有份擔正金像獎得獎編劇龍文康編劇嘅香港藝術節重頭戲《九江》，1月份再返去主持六合彩！祝大家好運！」
(蘋果日報)
