講到早前麥明詩提議馬國明帶佢去玩鬼屋？黃心穎笑謂：「唔敢呀，我會打人，我驚我會打佢喎。」佢仲話平日都唔敢玩鬼屋同睇鬼片：「睇完唔敢沖涼同瞓覺，要開晒燈先得。」
黃心穎與馮盈盈喺尖沙嘴出席萬聖節活動，黃心穎話萬聖節正日應該要開工，不過細個都有扮鬼攞糖果：「外國好興架嘛，我仲會去啲貴區，因為啲糖會大份啲。」而馮盈盈就話細個都會喺屋苑四出攞糖果：「Miss Chan Chan（陳潔靈）都住喺我哋屋苑，佢好nice好親切。」不過佢自爆喺同齡小朋友中比較高大，所以成日都係最後先派糖俾佢。
提到無綫裁員150人又關閉16廠，馮盈盈正喺16廠開工，黃心穎聞言即笑問：「係咪因為你？」馮盈盈就笑住話：「可能我太嘈被人投訴，其實大家都有同個廠留念，作為16廠最後用家，呢個廠已經完成歷史任務，依家改變用途…」接著又賣口乖一輪嘴狂讚無綫，非常識做，佢仲話工作氣氛無特別悲傷，大家都係做好自己。
黃心穎對有同事離職感心酸，希望大家盡快找到工作：「裁員大家都唔想，不過呢行流動好快，希望大家可以快啲搵到嘢做。」問佢哋會唔會擔心裁員潮延伸至藝員部？佢話：「都冇得驚，我會做好啲。」馮盈盈就話自己已經驚到唔識回應。
(蘋果日報)
