鄭欣宜（Joyce）、琦琦、許冠文、薛家燕及許懷谷等，噚晚到灣仔為一家新店開張任嘉賓。適逢Joyce新屋正進行裝修，故都有行下、睇吓有冇心水傢俬同贊助。
Joyce話：「裝修好貴，非常肉赤，屋企裝修最執著就係食飯枱，因為自己最鍾意喺食飯枱度傾偈、慶祝、開會，用得最多係飯枱，而舊有嘅四張餐椅就一直保留至今，其他嘢捐得嘅都會捐出去。」
何以如此重視該四張餐椅？Joyce話：「係鄺美雲送俾媽咪，好靚好有品味好舒服，因為想整好間屋，好多時自己都需要拍片影相，而裝修前牆身好似尿黃色，依家改為全白，冇咁肉酸，自己都會花啲心思去設計。」
琦琦啱啱出席完米蘭時裝週返香港，佢話之前都有抽時間同阿女去歐洲、美國玩， 琦琦話：「自己仲親自下廚煮牛扒俾大家食，點知心急燒著咗個鑊，自己仲隨手攞咗啲油淋諗住淋熄啲火，點知搶火，燒到個廚房黑晒，好彩冇燒親自己，老公都嚇親，叫我下次都係買外賣算。」
(apple daily)
