現年38歲嘅佢，為追夢加入娛樂圈，入行12年，演藝成績平平，但一直獲經理人公司支持，今年5月仲喺九展搞咗兩場音樂會，最近仲拍咗大台劇《解決師》，由樂壇踩入公仔箱。
胡琳為演藝事業開拓新路，但今日有報道踢爆佢日前秘婚，有指佢當日喺尖沙嘴一間意大利餐廳搞秘婚派對，只係招呼咗約30個最親嘅朋友參加。據知佢老公係圈外人，當日胡琳着住白裙好飄逸，同老公滿場飛招呼親友，一對新人sweet到爆，除咗攬攬，仲嘴對嘴。派對上有結婚蛋糕，由於胡琳件衫好低胸，老公體貼除下西裝褸為老婆披上，用行動錫晒老婆。胡琳喺派對尾聲仲換咗紅裙，似係用嚟送客。一向對感情事收到好埋嘅胡琳，突然閃婚，即傳出疑似雙喜臨門，畢竟佢再唔結婚生仔，好快就會做高齡產婦。胡琳今日喺facebook貼出婚照，手戴龍鳳鈪，抱住愛貓，佢留言：「很幸福，感謝大家的祝福#傻痴痴。」佢向傳媒發相，相中只見新郎喺夕陽下攬實新娘子，男方只係有背影，貫徹佢哋低調作風。
胡琳婚前兩日喺Instagram貼出喺床上親親愛貓照片，佢留言：「這樣子的親密接觸好治癒#argenthecat#平復我凌亂心窩#肝火旺。」噚日再貼出床照自拍大特寫，仲配上三個笑臉公仔，睇嚟升呢人妻後，心情好靚。
據知胡琳呢次閃婚，係連經理人都唔知，傳媒今日致電恭喜新娘子，佢話：「剛剛落機，我哋去咗泰國度蜜月，玩幾日，《解決師》未拍完。呢次結婚係好突然，我都冇通知好多朋友，因為屋企人想低調啲，唔想派對太多其他人。」胡琳話筒傳嚟興奮聲音。
胡琳期後再回應：「我終於踏入人生另一階段啦！實在緊張又開心！首先我很感謝大家的祝福，結婚是囍事，我由衷的想與大家分享喜悅，不過家人希望我們低調一點，為尊重他們意見，我們就選擇了低調進行。我與他也是個喜歡簡簡單單的人，本身計劃只簽個紙就算，然而父母特地來港，不設宴慶祝實在不行，所以就在餐廳簡單地舉行婚宴，只邀請最親的人出席，待婚後再向大家公佈喜訊，卻估不到這麼快就被公開了，結果，我成為人妻的首要任務就是向大家匯報婚事，感覺好特別！我在這裏，特別向一直『蒙在鼓裏』的好朋友說聲抱歉，因為要照顧家人的感受，唯有守口好瓶，感激你們的諒解！現在我已收到很多朋友陸續致電恭喜我，大家的心意我都收到啦！再一次多謝大家送上的祝福！」
同胡琳合作大台劇《解決師》嘅陳敏之，歡迎胡琳加入人妻行列，敏之回覆傳媒時話：「恭喜琳琳，太開心了！祝福她幸福美滿，快啲加入埋索媽行列。」
(綜合報道 / on.cc / apple daily)
