陳展鵬同單文柔這一對，都真係經歷咗唔少風雨。由最初不敢認愛，到戀情曝光之後男嘅被指利用胡定欣谷人氣，女嘅就俾陳展鵬fans毀天滅地式洗版留言狂鬧，搞到ig都要關閉留言功能。
之前曾表示不考慮擺酒嘅陳展鵬，又改變主意。據知婚禮將於本月13日假座四季酒店舉行。另今日出版之周刊亦以一對準新人做封面，稱陳展鵬最愛的女人不是單文柔，而是陳媽媽。惟陳媽媽近來身體欠安，令做仔心痛之餘，亦心力交瘁，情緒失控。
據報道指，陳展鵬母親年初曾中風入院，病後不良於行。陳展鵬急於結婚，一來係因為已找到「對的人」，同時亦希望沖喜一下。報道稱，陳展鵬一向篤信命理，不止寓所要睇風水求高人指點，感諸事不順時亦尋求指引，得知單文柔命格與之相，且婚後定必旺夫，仲越生越旺，令陳展鵬加速成家之意。
陳媽媽的病情，亦是促使陳展鵬結婚的最大原因。陳媽媽一直好想兒子快快成家，侍母至孝的陳展鵬，當然希望如母親所願，故近期佢一邊忙於籌備婚禮撲婚禮場地，一邊照顧母親、陪她接受物理治療，兩邊兼顧。單文柔亦十分體諒，幫手照顧未來奶奶。
報道指，陳展鵬自從母親患病後，一直將心事和情緒盡力抑壓，不願向別人求助，故有時情緒爆煲亦不自覺。而單文柔就做咗啲嘢令令一度徬徨無助嘅陳展鵬大為感動，例如送上熱敷眼罩，令失眠的他可以安睡。陳展鵬一次訪問中說：「我唔係一個熱情同擅於表達嘅人，但嗰刻好感動。」更形容心中那道門「俾佢鑽穿咗」。
（apple daily）
