早前藝人洪欣老公張丹峰傳出偷食索爆經理人嘅新聞，消息震撼全城，最後經各方出面澄清，事件告一段落。
早兩日洪欣喺微博發放同老公一齊做嘢嘅相大晒恩愛，點知尋晚洪欣突然喺微博留言：「打女人的男人要不得。」瞬即令人懷疑發生家暴，唔少網民都留言話好擔心佢嘅情況，有網民覺得係帳號被盜，亦有網民推測佢係講緊其他人都唔定。
而洪欣身邊嘅工作人員表示，因為佢哋習慣早瞓，未聯絡到問清楚情況，不過工作人員相信佢哋感情冇問題。
洪欣身邊嘅工作人員話聯絡唔到佢，令到事件更加似層層，短短數小時已經有超過6千個留言關心洪欣嘅情況！啱啱洪欣終於喺微博蒲頭現身解畫，佢話之前句說話原來係講緊早前內地一單老婦無辜被打嘅新聞，對於令到咁多人擔心，佢就話好抱歉！
雖然洪欣已經走出嚟澄清，不過事件仲未完結，因為佢講緊單新聞係一個18歲男子喺街度發脾氣，一位老奶奶路過好心勸告，結果畀年輕男子暴打，有部分網民就質疑18歲男子同老奶奶竟然可以寫成男人同女人，懷疑洪欣係掩飾慘遭家暴嘅真相。
(on.cc東網)
