今日星期一，無啦啦多咗國慶假期，好多人都安排咗活動玩下休息下，藝人們就趁呢個機會工作搵銀。
不過袁偉豪就唔好彩喇，早兩日佢喺ig先貼咗段滑水片段，龍精虎猛咁話要好好建立生活。
但到咗今日中午，佢率先喺微博更新微博，同大陸網民say sorry，話因為急性腸胃炎而留醫，唔可以去到大陸一個廣場出席活動。
為咗向大陸網民展示誠意，袁偉豪就算氣若游絲，都拍咗一段51秒嘅片親口道歉，佢仲提咗三次廣場名，feel到佢嗰種無奈同可惜。好多人都留言祝佢早日康復，亦都有人同袁偉豪一樣，抽到活動入場卷原本滿心歡喜，不過見到佢病咗，同佢一樣咁sad喎。
袁偉豪回覆傳媒時表示：「寶兒有陪伴我，我一向腸胃都比較一般，睇睇夜晚可唔可以出院啦！有心。」
(蘋果日報)
