日前一家三口出動去銅鑼灣行街。有BB同行，行裝自然大陣仗，孭住一架BB摺疊車。BB女一啲都唔輸蝕，頭箍、波點衫加布鞋粉紅襪，絕對係B界潮人！
今年李璨琛（Sam）可算係流年不利，先後兩次牽涉入官非，先係今年2月同朋友食開年飯後，俾交通警員截查，接受酒精呼氣測試證實超標近3倍，涉嫌酒後駕駛被捕，7月又捲入同官恩娜妹夫嘅官司糾紛（。不過今年42歲嘅Sam，12年同梁志瑩結婚後，等足6年今年一索得女。自囡囡李元元（Lucy）3月出世之後，佢就一副有女萬事足模樣。
日前Sam同老婆、囡囡一家三口出動去銅鑼灣行街。有BB同行，行裝自然大陣仗，見到Sam手挽一袋相信係嬰兒隨身用品，孭住一架BB摺疊車。Sam夫婦作為潮人，打扮自然夠潮，草帽墨鏡唔少得，BB女一啲都唔輸蝕，頭箍、波點衫加布鞋粉紅襪，絕對係B界潮人。
一家三口行到大概4點幾，搵咗間餐廳歎下午茶。Sam選擇坐喺室外露天位置，佢一邊呷住凍檸茶，一邊逗胸前囡囡玩，兩父女仲不停自拍。元元一啲都唔怕陌生人同動物，見佢望住身邊食客帶嚟兩隻唐狗顯得好興奮，手舞足蹈。
一家三口餐下午茶飲咗半個多小時，埋單後佢哋行去就近嘅的士站等車。當日都頗多人等車，輪候時間稍長，不過元元BB一啲都唔悶，等車時輪到媽咪同佢玩自拍，元元BB顯得好活潑，仲識笑撩後面一對女仕玩，搞到佢哋鬼死咁開心。
最後李家三口等咗大概10分鐘，先至排到的士。
(蘋果日報)
