藝人陳錦鴻出席其有份投資的金萬年酒家開幕活動。講到最近重返幕前為ViuTV拍劇，劇本講述他周旋於三個女人之間：「你話我點能夠抗拒，哈哈！依家仔仔大咗，我都想畀佢知，一個人係需要工作，佢以前覺得我搵錢好簡單，我要畀佢知拍劇好辛苦，想做個榜樣畀佢睇。
而且呢套劇係講愛情，仔仔依家青春期，我會喺屋企會同佢一齊對劇本，佢會問我點解仲唔離婚。我希望通過呢套劇，令仔仔對愛情唔好咁死心眼。佢睇書同老師都會教人要從一而終，但呢個世代唔應該畀咁大壓力自己，如果發現唔鍾意對方，大家又冇小朋友嘅話就應該盡快分開，我係怕佢傷到人又傷到自己。（你拍劇少咗時間陪佢，佢會唔會唔開心？）唔會，我會安排啲習作畀佢做，我幾夜收工都會幫佢改，令佢覺得大家係有連繫。」
講到酒家生意，他稱與一班股東自2003年開始合作做生意，在港有三間食店，廣州有一間：「2003年沙士爆發，演員工作停晒，朋友建議我做生意，但我完全唔識做生意，好在當年拍《創世紀》飾演許文彪、做資料搜集嘅時候，問咗超過五十個生意人關於經營商之道，後來有十幾個人都一直有聯絡、做埋好朋友，佢哋見我一個後生仔，咁被動做演員搞唔掂，所以叫我做生意。最初同另一個人諗住開間幾百呎嘅舖，後來愈嚟愈多人加入，最後間舖係二萬呎。」他坦言後來兒子出世，為照顧患自閉症的兒子故一度暫停生意及演員工作。
已出過兩本書分享育兒之道的錦鴻表示有興趣再出書，希望可以與兒子一齊合寫，但兒子對出書的興趣不大。
(on.cc)
