賺到錢當然生活質素自然高，日前，她便駕着過百萬名車離開屋企，到中環名店買燒鵝做午餐，之後返回銅鑼灣語言學校巡視一番。
一落車便有三位工人帶着其名種愛犬Borzoi迎接，全方位服侍，令她猶如皇后出巡般，相當有氣勢！
中韓混血兒宋芝齡於1996年參選港姐而入行，大多做主持工作，近年就為《都市閒情》任主持。早前，該節目決定轉型，一班主持一度不知去留，人心惶惶，雖然最後全部有得留低，但都嚇一嚇。
不過，一向被喻為「韓國通」的宋芝齡就「唔使憂」！據知，她十年前開始搞韓國生意，加上韓風靡全球，經過一番努力，近年已到達收成期，尤其韓國語言學校更搞得有聲有色，在香港區已擁有兩間學校，明年更會擴充至六間，現在每月的收入達六位數字，是無綫人工十倍！
事後記者聯絡宋芝齡，問她是否在商界大展拳腳，賺到盤滿砵滿？她謙稱：「唔係，只係啲生意慢慢上咗軌道。」她直言十年前開始搞學校，初時擔心沒有學生，要努力招生，又要做導師、整理教材，好多時都要在學校捱通宵，經過多年努力，現在學校已有一定規模，並打算由兩間增加至六間：「因為生意唔錯，所以有咁嘅想法，不過，我真係分身不暇，所以會以Franchise（特許經營）形式去做。」
除了搞學校，宋芝齡近年仲搞埋韓國投資移民，她謂：「起初只係有朋友想喺韓國做生意同買樓，叫我幫手睇啲條款同做翻譯，因為當地嘅移民門檻只需三百萬左右，之後有好多朋友都有興趣，所以就做埋投資移民生意，依家都搞幾好。」既然做生意做得咁好，問她可有考慮過退出幕前？她謂：「我好喜歡主持工作，如果我唔做幕前應該會走晒樣，唔會扮靚，所以一定要Keep住做，同埋啲生意都上軌道，依家都要學識放手，畀啲同事去處理，要有番一啲自己嘅生活。」
(on.cc)
