陳柏宇（Jason）太太符曉薇（Leanne）日前誕下愛女Abigail，新手爸爸對女兒愛不釋手，係咁瘋狂影相。
今日Leanne終於出院，不過Jason要到中山舉行演唱會，未能盡人夫責任接太太返家，要由Leanne朋友代勞。
下午四點，Leanne獨自抱住Abigail，在養和醫院樓下見傳媒，素顏戴住黑超踢拖嘅佢精神奕奕，行動自如，多謝大家祝福。
新手媽話：「好辛苦，估唔到有種撕裂感覺，又冇覺好瞓，兩至三個鐘就會被拍醒，同埋BB唔讚得，最初都讚佢好乖冇扭計，第二日就扭抱，可能老公成日抱住抱慣咗。」
Jason本來噚晚要出發到中山，但因為想見多愛女一面，改為今早才出發。Leanne形容：「好恐怖，今日去中山，走咗幾個鐘就video call我，打嚟傾咗幾句，就問我個女喺邊，我話：『我都話你唔係打嚟搵我㗎啦！』我唔會呷醋，佢咁錫個女都係好。以前我哋會為寵物爭寵，依家老公就話：『唔緊要啦，我有個女！』」
雖然今日出院搞到佢手忙腳亂，仲遇著工人姐姐到港要接機，只能交由朋友幫手，Leanne都好堅強話：「之前老公陪過夜，依家就由朋友陪，因為屋企都需要人照顧寵物。」Leanne又謂最初Abigail有少少黃，佢哋都好擔心，不過經醫生診斷後話BB健康，可以出院喇，大家先至放心晒。
出院返家後Leanne要真正落手落腳照顧BB，接受另一艱難新挑戰，但另一方面，今晚終於可以獨霸女兒：「喺醫院嗰陣，通常護士接手，即使我阿媽嚟到想抱B，Jason都抱住個BB，死都唔肯放手，係個好可怕嘅愛女狂。」
(蘋果日報)
