颱風「潭美」吹襲日本，首當其衝嘅係沖繩，原來大住個肚嘅吳日言日正身處當地，佢日前起程到當地，與老公重遊兩年前結婚之地，原本今日搭夜機返香港，未料遇上「潭美」，被迫滯留當地，要3日後先有飛機返。
吳日言今日向《蘋果》表示：「其實一、兩日前已經收到航空公司通知班機要取消，要喺度留多3日先至有航班安排到俾我，所以我要留多幾日。」
雖然留沖繩，但吳日言大讚當地人有人情味：「我原定今日要check out，但o依家因為機場封咗，所有陸路都封晒，就算我有車我都離唔開呢間酒店。不過日本呢度啲人好有人情味，原本我留低喺度要3,000幾蚊一晚，但佢反而收番我一個平咗嘅價錢，1,000一晚，俾我安全咁留喺度，唔好再周圍走。」
吳日言話o依家情況還好，起碼有瓦遮頭，不過因為佢話：「因為身處嗰間酒店好近海，好大風，同埋見到啲浪不停咁冚過嚟，我未試過聽到咁強勁嘅風聲，所以其實都幾驚，聽到啲風『啪啪』聲。」
之後吳日言再喺IG貼大肚泳照報平安，佢留言話：「原本今日回港，因為颱台24（港稱：潭美）吹襲沖繩，所以機場同陸路都全線封閉。可能Baby貴人出門招風雨，不過放心，同大家報個平安，我會留在安全地方。」
(蘋果日報)
