安志杰(Andy)早前同老婆Jessica C.、兩歲大女Tessa，三個幾月細仔Elvis，一家四口返咗台灣，陪安媽媽過中秋節，適逢大前日係Elvis誕生百日，安媽媽因為知道Andy鍾意中式飲茶，所以特別喺中菜館擺咗一圍，慶祝孫仔百日宴。
全晚最開心係安志杰媽媽，見到孫仔開心到見牙唔見眼，而Andy因為長期喺大陸拍戲，好少機會三代同堂一齊食飯，所以今個中秋節可以一家團圓，對Andy嚟講係最開心嘅事，Andy話：「好開心好難忘，可以同屋企人一齊賞月，為Elvis安排百日宴。」
安志杰媽媽特別訂造咗套中式傳統禮服送畀孫仔，安氏家族就送Cupcake做賀禮。Jessica就忙足全日，除咗自己要扮靚靚出席盛宴之外，最重要係為一對寶貝仔女裝身，Jessica笑話：「希望子女快高長大，看回Andy的童年照，發覺Elvis跟爸爸有九成相似，令我感到有點意外。」
(蘋果日報)
