楊千嬅重返大台拍劇，同「劍雄哥」黃浩然故劍重逢合作《多功能老婆》，套劇日前終於煞科，不過有報道指，同劇嘅陳煒因為千嬅遲大到，等到佢好嬲好嬲。
千嬅咁忙，就係因為同時間接咗電影《麥路人》工作，昨日《麥路人》喺灣仔舉行感謝宴，千嬅出席時被問到點睇啲報道，佢話：「其實冇咩回應，因為呢啲報道成日都有，其實就唔真實，不過有啲係事實。」
千嬅隨即解釋，事實係指的確有遲到過，但時間就唔長：「因為拍攝時間長短一定有，我哋度期係留咗好充裕嘅時間，的確拍《多功能老婆》係有三、兩次遲到過，都係十分鐘內，自己做咗呢行，一知道會遲就打俾寶華姐（大台資深編劇），叫佢拍住其他先，就算我或者助手都一定會做。」
分身不暇，連拍《麥路人》千嬅都有遇到突發情況：「拍《麥》就遲過一日，當日要去中環睇尾龍骨，唔醫就行唔到，你知中環有幾塞車啦，但遲幾多就真係唔記得喇，好耐之前嘅事。」佢再笑笑口講：「其實呢啲我都唔明，我等咗啲時間就唔係時間咩。anyway，呢兩套作品拍完好滿意。」
但報道講到陳煒好嬲？千嬅表示唔覺之餘，仲以入行多年經驗提出懷疑：「又唔覺喎，如果真係有咁嘅事點會依家先寫，都成4,5個月前嘅事，呢啲料唔會冇用㗎。」
(蘋果日報)
