因為林文龍同鍾嘉欣最近喺《再創世紀》再續前緣，為當年喺《法證先鋒》入便，圓咗佢哋兩個唔可以一齊嘅夢，再加上喺網上有唔少消息話《法證先鋒》將會開拍第4集，唔少網民好期待呢件事。
聽講呢套劇將會喺下個月舉行記者會，本來有傳話係胡定欣同馬國明擔任主角，點知最後原來係佢哋兩個都唔會做，除咗譚俊彥之前講過話會演出之外，其他人係一個謎。
不過今日李施嬅喺IG貼咗張影住《法證4》嘅天書相，留言話要做準備功課，之後陳煒同黃心穎就留言話大家要努力。
言下之意，女角人選將會係佢哋三個，咁男主角呢，有傳除咗譚俊彥之外，仲有黃浩然同埋鄭俊弘，咁啱得咁橋，監製梅小青講過呢套劇會係新配搭，睇嚟呢啲人選又好脗合喎！
查實網民最想都係見到歐陽震華、林文龍、蒙嘉慧、鍾嘉欣，以至後期嘅鄭嘉穎、佘詩曼呢啲原有班底助陣。
上一輯用咗黎耀祥張可頤徐子珊吳卓羲胡定欣，拍攝手法同之前《法證先鋒》系列好唔同，甚至乎有啲「Over」咗，太強調科技嘅pro，少咗「人味」，嗰陣已經有唔少聲音，唔知今次呢個組合，觀眾又會唔會接受呢？
(蘋果日報)
