陳自瑤（YoYo）同視帝王浩信嘅婚姻早前數度被指亮紅燈，但佢哋共同出活動，又分別否認傳聞，兩人結婚剛七年，育有6歲多獨女王靖喬，王浩信非常痛錫女兒，更喺社交網貼過陪女做功課相片，又收過囡囡慶祝台慶50周年嘅畫作，不過，近年卻未見王浩信同YoYo貼出家庭樂照片。
王浩信忙於拍大台新劇《解決師》，有讀者李小姐日前喺晚上9時許，喺機場抵港等行李嘅10號輸送帶，發現YoYo母女回港，李小姐透過《蘋果》嘅「爆相爆片」分享相片同短片，李小姐話：「我見到陳自瑤同個女推住行李車，喺10號輸送帶等行李，佢將架行李車推咗埋一邊，佢自己就走過去輸送帶查吓行李出嚟未，佢有時又抱下個女，有時又放低佢，我唔知佢邊度返香港。」
李小姐話YoYo攞完行李出閘，邊行邊打電話，無耐就有一男一女接機，個男人幫YoYo推行李，而YoYo見有人幫手睇住囡囡，就爭取時間撳電話，冇乜點理囡囡。
短片中所見，YoYo囡囡好乖，全程寸步不離媽咪，而視帝爸爸王浩信一劇接一劇，要享受一家三口家庭樂，相信要等埋王浩信拍完手頭上劇集有空，又要夾到囡囡學校假期先可以成行。王浩信今日回覆傳媒時話：「她們去了泰國，但因為我要開工，所以未能前往。」
(蘋果日報)
