郭富城出席電影《麥路人》晚宴，透露電影已拍得七七八八，只有小部份未拍完，如果導演想補拍或想追求完美，可以叫經理人安排一下。城城又讚今次合作嘅導演黃慶勳好勤力、好努力去準備，作為演員會盡量配合同遷就，又指現在已經拍緊另一部新戲，但詳情唔可以透露。城城今次同楊千嬅、鮑起靜及萬梓良合作，佢話對上一次同萬梓良合作，已經係30年前拍無綫劇《成吉思汗》，當時自己啱啱喺訓練班出嚟嘅新人。
城城緊接再開戲，豈不冇時間照顧囡囡？城城即笑話︰「呢個世界有wifi，有wifi就聯絡到，唔使擔心。」至於有報道指其母同太太方媛有婆媳糾紛，佢成為磨心？城城表示：「絕無咁嘅事，係憑空想像嘅小說，每次有電影上、有演唱會，都會有咁嘅封面同劇情，見怪不怪，只可以講呢啲係無中生有嘅嘢，喺呢一刻我屋企好健康，好快樂，好和諧，呢啲不實報道回應一次就足夠，（婆媳關好好？）當然啦！」
至於，有傳方媛再為佢陀第二胎，問城城有好消息未？佢就兜圈回應話：「大家睇住我大同成長，好關心我嘅家庭生活，總之希望大家比啲時間比啲空間我，順其自然，交俾嗰天，總之屋企係咪添多個丁呢？就由天安排，暫時無可奉告。」
(蘋果日報)
