大陸宮鬥劇《延禧攻略》，除咗帶挈幾位主角人氣急升之外，劇中富察皇后身邊嘅宮女「明玉」姜梓新憑住個「初戀樣」亦跑出，其後更因為喺大陸綜藝節目中唱《囍帖街》而大獲好評。
嗱，人紅就梗係是非多，雖然劇外明玉同海蘭察成日孖住出嚟放閃，但最近大陸就翻咗佢舊帳，指姜梓新喺2年前錄影大陸綜藝真人騷《完美假期2》嗰陣，就同節目內其中一個女嘉賓周晨晞經常有曖昧行為，兩人除咗喺節目內唔避嫌地又攬又嘴又餵食，仲話佢哋兩個以Simpson公仔傳情。
嗱，睇番呢位有幸同姜梓新傳情嘅同性密友周晨晞，個樣同行為都同陳冠希幾似，其實唔講的話，大家憑外型又的確幾難分得出佢係女仔，皆因周晨晞嘅打扮極為中性。而佢係節目度又不時主動攬錫姜梓新，兩人嘅互動十足十情侶，而且仲表現得鬼咁sweet，難怪會傳同性緋聞。
雖然有網民認為呢啲親密舉動只係節目效果，但姜梓新同周晨晞就從來冇否認又冇承認大家嘅關係，所以到底佢哋係普通朋友定密友呢？
姜梓新經理人馮小姐今日接受《蘋果日報》電話訪問，佢大方表示姜梓新目前冇男朋友，又否認同性戀取向，佢話：「沒有（男朋友）欸，真的沒有。是傳過跟周晨晞，她（姜梓新）家教比較嚴的那種，因為媽媽跟她住在一起。」
馮小姐透露姜梓新本身係南京人，早前嚟北京發展時，身體唔係咁好，所以姜媽媽就搬嚟北京一齊住，負責囡囡起居飲食，馮小姐稱：「你想她的年齡才剛畢業，所以沒有拖拍也很正常。媽媽也管得比較嚴，晚上不准出去，不能甚麼的呀。」
(蘋果日報)
