陳倩揚早前誕下孻女陳希桐Aurella，現時兩個月大，二仔三歲半，長子七歲，面對唔同年齡層小朋友好多事情分享，今日在灣仔錄影ViuTV何基佑主持節目《超級奶爸2》，何基佑本身有一子，年底將會再添一女，兩人大談湊仔經。
倩揚見到兩位哥哥都好錫妹妹，分別畫畫攝在妹妹床邊，佢話：「每日兩個仔同老公返到屋企都望住妹妹，我就自己一個煮餸冇人理我，我就快35歲，望到呢個畫面都好滿足。」成為三子之母會否做全職媽咪？倩揚會選擇性工作，慶幸現時網上平台工作可以喺屋企做，暫時湊女都唔算辛苦，因為兩個月係一個新生時期算易處理，只係喊下換片，反而要顧及兩位哥哥呷醋感受，倩揚話：「哥哥大個要畀多啲耐性，依家如果哥哥喺屋企我會盡量少啲抱妹妹，會畀番多啲互動兩個仔，特別係二哥，要分身畀時間三個小朋友。」真係忙過返工，所以倩揚話：「我身上呢條裙係未生前著，今日可以著得落，雖然未收哂身，會慢慢減肥唔急，依家家都好興微胖。」
老公見到阿女係前世情人咁冧？倩揚話：「老公話未感受到前世情人感覺，阿女喊嘅時候都係要我搞掂，老公都會問阿女唔係黐daddy多啲咩？」何基佑就話：「朋友等住拆我招牌，話我生個女肯定死喺阿女手上。」陳倩揚就笑佢做爸爸好難處理小情人，何基佑拭目以待囡囡出世，仲話：「平日覺得阿仔喊就喊啦，但如果女喊，就係爸爸衰爸爸唔好。」
(蘋果日報)
