薛芷倫日前喺Ig貼出一張同張新悅同袁詠儀三人合照，不過事後張新悅就對呢張相似乎唔多滿意，覺得自己被「膠面」同「好多P圖」，仲話：「其實我哋皮膚好靚。」
噚日張新悅話：
「唔知咩一回事，最慘相張搞到我好似膠面咁，好多p圖，其實我哋皮膚好靚。」
「其實大會仲有好多靚相，不過Fanny（薛芷倫）攞咗呢張嚟post。」
「Fanny 擺相係佢嘅決定，我最傷心張相咁膠面，好想拎張靚啲嘅相畀佢睇，膠面好核突，暫時冇需要，廿年後先啦。」
之後《蘋果》問番當事人薛芷倫，佢話完全冇P圖，只係用咗部美顏相機影相selfie。薛芷倫仲話，影完之後，「佢哋仲話影得啲相好靚，成晚係玩得好開心，我覺得我相信，靚靚都同意，嗰晚係一個好開心嘅一晚。」再問此事會否影響佢同張新悅感情，佢就大方話：「同枱食飯、相聚都係一個緣份，隨緣。」
張新悅今日接受本報電話訪問時，就解釋自己噚日嗰番說話呢，其實係冇特別意思，只係想講唔使任何美顏工具，大家皮膚都靚：「今天有朋友send俾我睇啲報道，問我係咪講錯嘢我先留意到。我真係冇任何唔好嘅意思，但表達得唔好。原意是輕鬆講下笑，無留意會引起誤會，所以依家都係唔好講咁多，怕越描越黑。」
問張新悅會唔會搵薛芷倫解釋番件事？佢就話：「私下會做，相信Fanny（薛芷倫）會明白！」
(蘋果日報)
