陳慧琳(Kelly)昨日以大使身份出席尖沙嘴舉行「十一良心消費運動」記招，更與小朋友拍片宣傳，呼籲大家每十次消費時，其中一次幫襯社企，會場亦設有二十個社企攤位，Kelly指參與今日活動最期待環節便是到攤位消費，佢表示已經帶定錢同有目標攤位。
社企協助不少單親媽媽家庭，最近學整麵包嘅Kelly表示可以教單親媽媽，等佢哋有一技之長，自力更生，Kelly笑言：「第一次整都失敗，好似石頭咁硬，o依家再上網搵吓資料同技巧可以再學多啲。」
下個月2號係Kelly結婚十周年，問到佢點樣慶祝？Kelly驚訝話：「十年？十年喇咩？咁要慶祝吓。」
講到夫婦之間係咪keep住新婚感覺？Kelly變嬌嗲話:「都係㗎，都甜蜜嘅。」Kelly指相處之道係夫妻間互相尊重：「唔好嗌交，遇到風頭火勢時，大家可能會怒火中燒，互相冷靜幾日，最終都係會忍唔住笑咁就冇事。」Kelly笑指完全唔覺得老公有任何秘密驚喜進行中，兩人過去幾年亦沒有慶祝結婚紀念；至於會否二人世界慶祝？佢話：「同埋小朋友啦，雖然佢唔知發生咩事。」
(蘋果日報)
