佘詩曼(阿佘)憑住《延禧攻略》「嫻妃」一角最近爆紅中港台。劇中同佢爭寵嘅女星，年齡全部都細過佢，好似飾演魏瓔珞嘅吳謹言，現實生活中係28歲，而演富察皇后嘅秦嵐就37歲、演高貴妃嘅譚卓係35歲。
阿佘戲中角色設定為23歲嘅「嫻妃」，雖然比現實年齡43歲要「後生」20年，感覺有少少勉強，但佢勝在有演技搭夠。其實，阿佘除咗要逆齡拍戲，呢排仲要周圍飛去宣傳呢套劇，不過見佢依然容光煥發，都應該好有一套護膚攻略。
阿佘喺劇入面嘅角色係相當怕老，原來佢戲裡戲外都好貫徹，好似之前佢出席雪花秀嘅活動，佢就講到現實生活中同戲入面角色一樣，唔願接受皺紋，更講笑皺紋係「最討厭的東西」，佢對傳媒大講護膚心得：「我後生時覺得要預防，所以20年前已搽頸霜、面霜，搽得好足，手肘都好緊要，所以o依家仲可以。」
講返當日拍攝《延禧》時係夏天，要拍足兩個月，皮膚好受挑戰，面對45度高溫，皮膚非常缺水，更笑言要同劇中女主角交換保濕方法，最後發現撐傘搽防曬，再加敷面膜最有效。除咗做足護膚，阿佘平時養生都好注重，就最鍾意食生果同大量飲水，先keep到無瑕肌。
(蘋果日報)
