《多功能老婆》終於煞科，噚日楊千嬅、周柏豪、黃浩然同陳煒等齊集將軍澳出席煞科宴。「劍雄哥」黃浩然就話拍得好過癮，同「方麗娟」千嬅再次合作好多火花，仲自爆：「噚日同柏豪講佢壞話，佢不停NG，係咁笑。因為佢唔喺度，所以只好講佢啦。」
千嬅聞言即否認話：「你咪亂講呀，我冇係咁NG，我一秒鐘都唔嘥0架，我都想早啲返屋企。」千嬅仲話本來自己嘅戲份一早煞青，可以提前去上海過節了，但就撞正「山竹」，結果等到九月底先拍晒。」
噚晚就俾黃浩然爆佢係咁NG，今日就有周刊報道指千嬅拍《多功能》期間，因為同時又要兼顧拍同郭富城合作新片《麥路人》。想像一下都知，一邊趕劇（仲要係無綫），又要拍戲，真係鐵人都唔掂，千嬅仲試過48個鐘冇得瞓。周刊報道就指，千嬅死頂上陣，但開工檔期時間有時難遷就，所以不時遲到，令《多功能》演員同工作人員都好影響。
報道形容千嬅「頻密」遲到，其中一場同陳煒嘅對手戲，煒哥都等到躁，因為兩人最多對手戲，所以如果《麥路人》嗰邊唔放人令千嬅遲到的話，煒哥通常都係「食正」嗰個。其實日日拍都好Chur，梗係想快快回家休息，但對手又遲到，工作戰線無限延長，都幾慘。
(蘋果日報)
