藝人利嘉兒（Lily）與老公Bong結婚八年，奮戰8年，終於成功懷孕。今日佢仲宣佈已經生咗囡囡喇！44隨高齡產婦利嘉兒於上星期（9月19日），在舊山頂道嘉諾撒醫院為從商的丈夫劉先生誕下女兒， 體重7.2磅，母女平安。女兒名字為劉書雅，英文名Karyssa。
利嘉兒生完後大談生B感受，佢透露BB喺山竹襲港後出世，一切都好順利：「BB幾肥美，屋企人冇諗過我咁細粒會生到咁多肉嘅BB，肥嘟嘟好多表情，食得瞓得好精神，瞓瞓吓仲會偷笑，瞓醒就會眼仔睩睩，姑娘都話佢係開心果。BB出世前咁啱打風驚佢出世後都未打完，會唔會封路？天氣差？醫院周圍好多樹，好彩出世前已經冇打風，佢係陽光普照晏晝出世，出院好順利好感恩！」利嘉兒又透露為何會選19號生產，她說：「生完可以返屋企過中秋，係我同佢一齊過第一個中秋節。」
講到生產趣事，利嘉兒就滔滔不絕地說：「今次個生產過程老公都有兩件趣事好好笑，佢一早已經預備咗入嚟剪臍帶，以為就咁剪好簡單，佢入嚟嗰刻咁啱見到BB喺肚入面出嚟好血淋淋，佢都有啲嚇親，原來個小朋友係咁樣出嚟。」她續說：「第二件事就係外籍麻醉師問老公剪臍帶時要唔要影Video，點知睇番PLAYBACK係冇嘢，原來冇錄到，但老公話唔緊要，最珍貴畫面已經留喺心中、腦中。老公都有影低BB喺肚出嚟嗰刻，佢問我要唔要睇番，我話唔要呀，好得人驚、好血淋淋。」
講到BB似邊個？利嘉兒就話：「大部分人話似老公多啲，多頭髮，面豬仔就肥嘟嘟好似豬油包咁，呢個就係佢出世第一刻嗰樣。」
利嘉兒又分享生B感受：「姑娘放喺我手度感覺好得意，心諗嘩呢個邊個嚟？以後就係我同佢最親嘅關係，以為係會好感動會喊，點知係冇，可能麻醉藥未過，後尾個人醒晒就好掛住佢，連覺都唔想瞓，一對住佢好想錫佢、攬住佢，我諗每個媽咪都係咁，真係好開心。」她續說：「BB個中英文名都係自己改，中文名叫劉書雅，我鍾意女仔有書卷氣啲，同埋我希望佢講嘢行為比較優雅啲，英文名Karyssa其實係古希臘一個名嚟，名喺法國意大利比較多人用，意思係充滿愛，好被愛，我當然好希望我囡囡係我哋好有愛嘅環境包圍佢，等佢有開心嘅童年，都希望佢係人生中學識愛自己、愛其他人，係好有愛心嘅小朋友，識愛錫小動物，因為我覺得人有愛心係好重要，其他都係其次，所以好希望佢有呢樣特質。」
問到對囡囡有甚麼期望？她說：「啲人都會話最緊要健康，我自己會覺得啲答案咁『行』，但當我做咗媽咪我發覺小朋友健康開心係最緊要，勝於一切，所以期望就係佢有一個快樂童年、一個健康身體，佢大個係可以做佢自己鍾意嘅嘢，搵佢人生中鍾意嘅嘢，我希望佢整個人生都係好開心、好有意義，呢個係做父母最希望嘅事。」
（on.cc）
