譚小環轉營開小食店後，生意搞得有聲有色，店越開越多。
不過最近有讀者報黎先生料話幫襯譚小環嘅渣哥東涌新店買生菜魚肉時，食到有菜蟲。讀者黎先生今日（24日）下晝3點幾係東涌渣哥買咗生菜魚肉同碗仔翅返屋企食，當時佢仲見到老闆娘譚小環在場。
黎先生接受本報電話訪問時話：「太太碗生菜魚肉食咗3份1嘅時候，發現有條蟲，應該係菜蟲。」跟住佢就拎咗碗魚肉落舖頭，黎先生話道明來意之後，對方講咗聲「唔好意思」就問黎先生想換返乜嘢食物。最後黎先生換咗等值嘅魚旦離開，佢話：「我同佢講碗魚肉有嘢嘅時候，身邊啲食客都望咗一望。」黎先生話冇要求其他賠償，只係想譯小環可以管理好啲食物質數而已。
東涌係渣哥日前新開分店，老闆娘譚小環連日都去監場，視察業務，對於有讀者投訴吃生菜魚肉出現疑似菜蟲，小環回覆《蘋果》，佢喺電話中說：「我哋2014年開業到依家，四年幾，同一班員工，但我哋向來對食物處理好小心，洗菜都唔會忽視，我哋尤其注意食物衞生，咁多年嚟我哋都有提醒員工洗菜要小心，從未發生過今次有食客發現有菜蟲事件，當嗰位客人返嚟同我哋講番，我哋有道歉，亦有問佢想退錢定更換其他食物，佢揀換咗幾份魚蛋開心離開，佢接受咗，唔知點解佢仲傳相《蘋果》。今次發生咗呢件事，我哋再檢討，亦再三提醒員工，即使頭髮絲咁幼菜蟲都要小心。」
(apple daily)
