會場上有唔少圈中好友都到賀佢嘅大喜日子，好似有JW王灝兒同男友Tarzan、彭健新、蔡一智、黃婉曼夫婦、吳國敬等等，而陳貝兒亦擔任司儀，會場外擺有一對新人嘅結婚相，背景以粉紫色及鮮花佈置，簡單優雅。
吳國敬
昨日係商人羅傑承同首任前妻所生嘅大女羅雪儀（Cherry）出嫁嘅日子，上午時新郎同八位兄弟到達女家接新娘之後，至下午兩時，親友紛紛到達灣仔君悅酒店見證Cherry同丈夫Colin嘅簽紙註冊儀式。
擔任司儀嘅陳貝兒接受訪問時話，今日好開心。
佢仲話：「我以前喺羅生公司做嘢時佢好錫我，其實我都算係同Cherry由細識到大，知佢要結婚當然好開心，雖然今日有工作，但係都特登推咗嚟賀佢。」陳貝兒仲話今日成個婚禮感覺好sweet，今日簽紙時已經非常感動。
陳貝兒仲爆原來羅生秘密整咗一段片：「片中講到由細到大羅生都好錫呢個女，阿女開心同唔開心自己都喺身邊支持，我都同Cherry講話你呢一世人，第一個最愛你嘅男人一定係你Daddy，依家羅生就要將你交俾Colin照顧。」而新郎哥Colin亦喺現場向外父承諾會好好對待Cherry。
而JW同男友以一班好友亦有到場出席婚禮，問到JW係唔係下一個到你？佢笑言：「冇咁快冇咁快！」而男友見到記者仲係有啲怕醜，最初都唔係太敢同JW合照。
JW王灝兒同男友Tarzan
JW王灝兒同男友Tarzan
同丈夫一齊出席婚禮嘅黃婉曼亦表示：「我祝佢哋早生貴子啦，我生完小朋友後覺得係好滿足嘅，再加上佢家族大，多兄弟姊妹，好熱鬧，希望佢生多幾個。」
(apple daily)
