唐詩詠留言：「你已經成為我最重要嘅人，事無大小我都一定要同你講先得嘅，我一定要尊重你嘅！」
杜汶澤老婆田蕊妮將於星期五（28號）踏入41歲，閨密唐詩詠為佢提早慶生，買咗一個好靚嘅生日蛋糕，攬住壽星女啜咗一啖，阿田在社交網晒兩人合照，寫道：「有人問點解你哋兩個會咁好嘅？我哋二口同聲話緣分囉！」
年頭舉行頒獎禮，「最佳女主角」得獎者係《不懂撒嬌的女人》唐詩詠
當時喊晒同田蕊妮攬，好姊妹之情令人動容！詩詠喊住話：「一直等緊一個機會多謝佢，佢教我做戲，教我做人，佢成日聽我呻，又肯陪我瞓，佢每次話完我鬧完我之後，最後都會講一句，你要記住你係好好嘅，多謝你田蕊妮小姐，我一路等緊可以喺台上多謝你。」
阿田比唐詩詠大4年，兩人因合作拍劇集《造王者》認識，做咗好姐妹後無所不談。
阿田笑言自己係「詢問處」，寫道：「之後事無大小佢都會同我分享，佢唔開心嘅時候，我會擔心佢。佢開心嘅時候，我會戥佢高興。佢會問我好多問題，有時我會懷疑自己額頭係咪寫咗詢問處呢三個字！哈哈！但係當佢有幾日無揾我，無問我嘢我又會好掛住佢！多謝你提前幫我慶祝生日，這是我今年第一個蛋糕，希望我地（哋）大家都健康幸福。I love u.」
唐詩詠則留言：「田大小姐生日快樂！我祝你快D甩難，唔使再陪我瞓同聽我呻，但係問問題呢方面真係冇辨法，你已經成為我最重要嘅人，事無大小我都一定要同你講先得嘅，我一定要尊重你嘅！」
(apple daily)
