「富察皇后」秦嵐日前旋風襲港，連蔡卓妍、何超蓮都要搵皇后集郵，吳謹言、秦嵐演出嘅《延禧攻略》完勝由大卡士霍建華、周迅演出嘅《如懿傳》。
然而，原來「魏瓔珞」吳謹言、「富察皇后」秦嵐、「明玉」姜梓新、「爾晴」蘇青當初都曾試鏡爭做《如懿傳》，但全部被擯出局！事緣《如懿傳》係大卡士大製作，被視為紅爆劇《後宮甄嬛傳》嘅姊妹作，早前扮演「嘉妃」嘅辛芷蕾曾透露，當時幾乎北京所有女演員都去試鏡，連宮女、嬤嬤嘅小角色都爭崩頭。
《如懿傳》試鏡相牆上出現秦嵐、蘇青相片
最近播出拍攝紀錄片內，有一面牆貼滿試鏡演員相片，就包括《延禧》4位女角，有傳秦嵐試鏡做丫環，疑似係爭演反派「阿箬」角色，「爾晴」蘇青試鏡演「陳婉茵」，「明玉」姜梓新就試鏡爭做「舒妃」，甚至吳謹言嘅相片都出現試鏡相牆上，但不知甚麼角色。
傳蘇青試鏡做「陳婉茵」
秦嵐曾試鏡做《如懿傳》，但名落孫山。
結果4女竟然全部名落孫山，最後又巧合地齊齊接演《延禧》，點知劇集爆紅，帶挈佢哋人氣急升，真係塞翁失馬焉知非福！
(蘋果日報)
