Jacky仔…………
係咪一講就知係邊個呢？人稱Jacky仔嘅王樹熹，2004年起就演出多套劇集，細個時候嘅佢，拍劇時表情多多、得得戚戚、演技真摰，成功奪得萬千觀眾芳心！真係大佢少少都會鍾意咗佢！但係點解會冇啦啦講起佢？不經不覺佢已經19嵗喇！
Jacky仔最近出席活動時，當年趣致模樣無咗，變成乖仔斯文look。
提到拍過咁多套劇集，邊位演員令佢最深刻印象？Jacky仔諗咗一陣就答，「係歐陽震華，2007年同佢拍《爸爸閉翳》，做佢個仔。真係隔一兩日就見一次，佢成日都同我玩，有時又會教下我。另外仲有劉德華，當年拍《童夢奇緣》我做佢年輕版嘅弟弟，雖然同佢無戲份，但佢都有嚟探我地，又會關心我讀書呀，又會同我玩。」
小時候可以同咁多巨星合作，真係唔係每位童星都會有嘅經歷。2009年，Jacky仔因為準備升中學開始淡出幕前，突然之間無咗童星嘅光環，會否有點失落？他就話，「我覺得心態要轉變嘅，始終童星長大後就會比較少啲機會拍攝，咁我都覺得學業要緊，始終唔可以忽略。咁而家入咗大學，有機會同時間咪接返，其實做童星對我嚟講係一個幾有趣嘅經驗。」
而家讀緊城市大學媒體與傳播系嘅佢，依然好熱愛演戲，雖然近年傳媒寒冬，但Jacky仔嗰團火依然無熄，「希望畢業之後可以從事返傳媒行業，我真係好有興趣！」
希望大學畢業後會娛樂圈都會見到Jacky仔啦！
(綜合報道 / on.cc / hk01)
