擁有驕人身材，曾經被無綫欽點演出《3日2日》，結果一鳴驚人，但唔好以為淨係得個殼，佢嘅演技都唔差。琴晚播出《再創世紀》喺入面只係一分鐘嘅演出，已經畀網友激讚！
講番入面嘅角色背景先，喺2009年3月9日，匯豐控股由開市40.5元急跌至下午開市38元，競價時段最後半分鐘報37元，最後3秒，有300萬股沽盤以33元買入，最後以33元收市。當時正在為電視台做直播節目的股評家胡孟青，嚇到喊咗出嚟，有關片段更被網民錄下，更廣泛流傳至今。
而Lucy尋晚在《再創世紀》中就係重演胡孟青呢一幕，雖然只係演出一分鐘，但係Lucy即刻演技大爆發，眼紅紅忍淚報道令股民勾番起呢段傷心嘅回憶。劇集播畢後，社交網即掀起熱烈討論，網民留言都一面倒讚好，仲為Lucy懷才不遇感到不值。
藝人李旻芳（Lucy）入行五年，近年擔任無綫節目《東張西望》外景主持，開始為人熟悉。
Lucy收到網民嘅留言，即好有心咁逐一回覆，今早再cap圖留言致謝：「琴（尋）晚第三集嘅再創世紀播出後，有好多人都話留意到我短短一分鐘嘅演出，好開心每次用心的演出你地（哋）都有留意得到。好開心你地（哋）都喜歡我每一次少少的演出。無論係咩角色，那怕鏡頭出來只有一兩秒嘅時間，每一次我都視為最後一次。每一次都放十倍的努力去演繹，為嘅就係希望得到你地（哋）嘅支持同肯定。咁我就心滿意足喇☺ >>swipe right for comments，而希望今次再創世紀入面重現返（番）2009年嘅股災⋯⋯⋯唔好喺現實生活中再重現⋯⋯港股你要加油啊」
（on.cc）
