獲香港電影金像獎「最佳新演員」，近年主力拍電影，不過感情事就一直都好低調，最近被爆孖老婆遊日本：「佢好細心拖實老婆行，我見佢老婆行得比較慢。。。」
憑電影《狂舞派》，2014年獲香港電影金像獎「最佳新演員」嘅蔡瀚億（Babyjohn），近年主力拍電影，而佢成名之前，2013年已經同拍拖多年，同樣係演藝學院同學嘅張嘉琳（Donut）結咗婚，話咁快兩人都結咗婚5年。而Babyjohn一向都將感情事低調，就算喺佢ig都好少見佢擺老婆相，可能老婆Donut唔係做幕前，唔習慣見光啩。
今個月6號，有讀者透過爆相爆片，影到Babyjohn喺日本東京築地出現，當日喺早上11點半左右，築地市場人來人往，讀者潘先生話︰「初頭都冇留意，因為我唔係好識Babyjohn，不過見佢打扮得比較文青，有啲香港人行過都回頭望下佢。」
同行仲有Babyjohn老婆Donut，潘生話︰「見佢拖住咗個女人行，咁我上網睇過原來係佢老婆，築地市場好逼人，佢哋拖到實行穿梭啲檔口，有睇生蠔、海膽檔口，但我見佢好似齋睇冇買。」讀者仲發現Babyjohn對老婆好鬼細心，潘生話︰「佢好細心拖實老婆行，我見佢老婆行得比較慢，所以留意佢哋多一陣，唔知係咪粗身大細（指懷孕）？我見佢老婆略為肥少少，不過Babyjohn真係好細心，一路take care住老婆。」
Babyjohn早排榮升做姨丈，佢抱住BB，成個慈父樣。
(蘋果日報)
