胡定欣、Shine同黃偉文今日喺中環出席一個品酒活動，對於陳展鵬日前宣佈下月娶單文柔，定欣似乎有備而來，主動話：「恭喜佢，好開心我嘅好拍檔有喜事，我哋有個群組，大家知道消息之後，不斷send訊息畀佢。」
問佢會唔會去飲？定欣表示：「唔知佢搞唔搞婚宴，如果搞，佢又邀請我，我會出席。」講到陳展鵬於早上09:09寓意長長久久的時間公佈婚訊，有網民解碼為定欣生日日期，定欣笑住話：「我冇留意，但網民好犀利，我覺得係揀得啱，長長久久，又易記，做得非常好，我仲諗到送酒做賀禮。」
至於定欣嘅感情生活，佢指自己一直都好畀心機工作，每個月都要飛去外地做嘢，就算o依家休息期間，月尾都要去瑞士拍旅遊特輯。提到佢嘅緋聞男友張振朗最近同余潔滢傳緋聞？定欣話：「係咩？我唔知道，大家都忙。（會唔會八卦下？）轉頭丫！」
黃又南早前將患有腦退化症嘅爸爸送去護理院，交由專業人士照顧，佢表示中秋節會接爸爸返屋企過節，佢話：「媽咪、姐夫佢哋去日本旅行，所以我到時責任重大。」
(蘋果日報)
