「佢話咁樣先叫禮物呀嘛。可能我養成咗報喜不報憂嘅習慣，細細個喺加拿大同婆婆住開始就要獨立，唔想屋企人擔心，依家喺社交平台都唔會寫自己唔開心。」
歌手鄭欣宜推出由Supper Moment作曲、填詞的新歌《關於寂寞》，她自爆沒有向對方邀歌，卻突然收到demo：「我勁愕然，一聽就發現句句都『銳』中哂。我爆喊打畀Sunny話『你哋都準備緊紅館演唱會，做乜寫歌畀我？』佢話咁樣先叫禮物呀嘛。」提到Sunny自嘲demo唱得核突，她即笑言：「我話係呀，佢唱得好難聽，因為佢用我個key。之後佢傳訊息話佢了結咗個心願，我覆佢話，咁即係我要嫁畀佢？」
分享寂寞感覺
欣宜坦言受到Sunny鼓勵，因此罕有地跟樂迷分享寂寞感覺：「可能我養成咗報喜不報憂嘅習慣，細細個喺加拿大同婆婆住開始就要獨立，唔想屋企人擔心，依家喺社交平台都唔會寫自己唔開心。」說到最夭心夭肺的一句歌詞「擠身派對喧嘩，找一刻歡快避過獨個夜晚」，獨居的她表示很喜歡邀請朋友到家中吃飯和玩，不過朋友總有歸家的一刻：「其實唔一定唱正能量嘅歌，有好多唔同嘅情緒係好真實。同我差唔多年紀嘅人可能咁啱單身，或者屋企人慢慢開始老，要自己一個人住，我未必答到點樣面對呢啲感受，但起碼同大家一齊經歷緊，都算一種鼓勵。」
搵朋友分擔
問欣宜不如找個人一起住？她笑言：「我希望快啲搵到老公，不過我好衰，好似男仔性格啲，鍾意一個人，但又驚寂寞。（搵一個你想佢陪你先出現嘅人？）有冇咁筍？」她自言壓力大的時候會獨個兒在家哭泣，而發洩過後最重要記得自己有很多同伴：「其實上年我好唔開心，好似呢句歌詞咁，『酒精酵出眼淚我已很慣』，但每一個人都要經歷呢啲階段。咁啱許廷鏗教我打牌，每晚起碼有3個人陪我，就冇發生更唔開心嘅事情。有時一個人真係會亂諗嘢，好彩我到爆發嘅時候肯同朋友講，就算未必解決到，都可以分擔吓。」
(on.cc東網)
