14年拍拖，17年結婚，佢哋兩個嘅囡囡已經2歲大，細仔喺今年6月出世，湊夠一個「好」字，生活美滿幸福，老公好多時要飛去大陸拍戲，專心搵錢養家，而JC就留喺香港忙做辣媽湊細路。
JC日前喺西環湊女，被《蘋果》讀者凌先生透過「爆相爆片」捕獲，當時大概3點半鐘，見JC一個人推住BB車，Tessa就坐喺車入面，JC一身黑色小背心短褲，隱約露出佢嘅事業線，生完BB兩個幾月，已經差唔多回復以往身形。
凌先生見到佢兩母女喺西環堅尼地城海傍，JC推住BB車過馬路，佢話：「佢哋行去西祥街，Jessica C.推架車過馬路，佢見到第一架車經過停喺度，過咗架車佢就急推架車過馬路，但當時仲係行人紅燈，同埋落緊少少雨，都有少少危險。」
之後，JC就推住BB車行咗去附近寶翠園嘅商場，佢入到商場等升降機時，彎低身同囡囡傾咗幾句，好有警覺性嘅JC見到凌先生影緊佢，仲笑咗笑，之後就同Tessa入咗商場行街。
其實，JC身為人母，有兩個小朋友，真係要以身作則，帶住囡囡衝紅燈過馬路呢個行為真係相當危險，咁樣不遵守交通燈違規過馬路最高罰款$2000，罰款事小，兩母女人身安全事大，真係唔好再亂嚟喇。
(蘋果日報)
