林作同麥明詩喺前年分手，結束咗3年感情，但兩人關係一直拖拖拉拉，試過分手後影到兩人同對方家人食飯，或者係二人世界嘅相。
最新發展有啲莫名其妙…林作噚日喺時尚網站嘅Blog撰文，無啦啦宣佈分手，但就冇講明對像，但臨尾就補多句「備註：不是大家想當然的那位」似暗指緊麥明詩。今日林作喺ig轉貼番自己嘅文章，但就少咗呢句備註，文章開宗明義，話喺噚日「結束了一段數年的感情。早已分手，但藕斷絲連。」
（ig截圖）
林作突然坦白話，第一次見面就鍾意咗對方，而自己當時係有女朋友嘅。佢又話幾年後兩人終於可以喺埋一齊，係好幸福，但最後衰自己：「但我不懂珍惜，是我的錯。我讓妳感受到愛情的苦，卻沒有給到你甜。我和前度的糾纏，讓你徹底對我失去信心。」
林作話分咗手，但兩人仍然係朋友，自己諗法係想復合，但冇諗過對方提出分手嘅原因係：「因為你真的想出去玩。我只想對妳好。妳卻選擇跟媒體想得一樣——認為我是靠不住的……你四圍愛，我懂。滿足你的虛榮、空虛、寂寞、好奇，我懂。只是，今次，我希望對自己認真。」
林作喺文章形容自己唔灑脫、顧家、專一，每次聽到有朋友講起前度嘅情史都會受不了，佢話兩人相遇係「早了至少十年。」呢次仲令佢上咗人生一課：「拒絕，是人生最難的一課，特別是我。或許就是要面對著你——我人生第一個真正讓我學懂愛的人，我才會學得會。」
有網民睇完佢篇文，覺得一頭霧水，留言問事實定作文，又有人話林作唔應該咁樣公開講「麥小姐」，而林作就回應都係事實，同「麥小姐」都只係緋聞，唔算係愛。
(ig / apple daily)
