喺金鐘一間酒店舉行註冊儀式，由於為人較為低調，所以婚禮以cocktail party形式進行，並且只係邀請兩家嘅家人及幾位圈中朋友。。。
黃德斌同圈外女友Joyce Wong拍拖18年，今日終於正式拉埋天窗，喺金鐘一間酒店舉行註冊儀式，由於德斌為人較為低調，所以婚禮以cocktail party形式進行，並且只係邀請兩家嘅家人及幾位圈中朋友麥子樂、徐榮、戚其義、簡慕華、李啟傑等等。
身穿便服嘅德斌，講到佢成家立室，加上《逆流大叔》票房報捷，可謂雙囍臨門，德斌表示好開心。票房好先有結婚嘅諗頭？德斌話：「冇特別㗎，你哋成日問我，我都話隨時結，真係咁啱㗎咋，冇話套戲咁，然後先咁，冇㗎！」問到婚宴形式？佢表示：「同親戚、幾個圈中朋友下晝食下嘢，所以冇兄弟姊妹團。」雖然德斌指冇接新娘同玩新郎儀式，但有向長輩斟茶。
問到有咩愛的宣言向太太講？德斌笑住話：「你知我㗎啦，多謝你哋關心。」佢仲指註冊嘅時候，都覺得好感動。由於工作太忙嘅關係，聽日繼續為《逆流大叔》謝票，所以德斌透露未有計劃同太太去渡蜜月。至於生小朋友計劃？佢即刻指：「未有計劃，唔容易㗎，呢個年代唔係你想就想點，自己handle到先，0依家玩住人哋嗰啲先，幾好玩㗎！」
麥子樂表示同德斌相識十幾年，又跟Joyce好friend：「Joyce嘅父母好玩得，成日都見到，衷心恭喜佢哋白頭到老，永結同心。」送咩禮物？子樂話：「佢以前成日請我食飯，請我飲嘢，所以喺佢嘅大日子，我封番封勁嘢畀佢。」
趙希洛就話今日嚟係送人情，同埋叫德斌快啲做老竇。而簡慕華、戚其義、戴耀明、徐榮及李啟傑等圈中好友亦紛紛到場祝賀，戚其義仲帶埋韋家雄嘅喜帖嚟派。
(蘋果日報)
