著名時裝設計師何國鉦其公司成立25周年，與一個鐘錶品牌喺灣仔會展舉行一個cross over時裝騷，今個月預產期嘅名模Rosemary、關楚耀及傅嘉莉(Kelly)將有份行騷。其他出席嘅嘉賓包括梁詠琪、傅明憲、陳煒、鄺美雲、何傲兒、謝雪心、貝安琪、童愛玲、谷祖琳、龐景峰、陳法蓉、李若彤、李蕙敏、黃佩霞夫婦等。
下星期分娩嘅Rosemary着住4吋高踭鞋現身，佢話已經好少着高踭，問到陀住BB行騷驚唔驚？佢話：「唔驚，點解要驚呀！(你大肚喎！)我依家都有教瑜珈嘅，老公都唔知我行騷，但相信佢都會反對嘅！」Rosemary話自己都已經準備好晒，Ready生BB，都有啲緊張同興奮。問到知唔知自己肥咗幾多？「唔知呀！冇磅到，(綵排情況如何？)其實我係同Dorian一齊謝幕，佢會拖實我，我都係大肚啫，又唔係傷殘。Dorian對我嚟講係一個好amazing嘅人，所以佢邀請我，我一定會嚟，我好有信心，會等我行完個騷先出世，係一個好好嘅紀念日，係我生之前最後一個騷，今次會揀順產，好好彩陀BB咁耐都冇唔舒服，都算好好彩。」
Kelly與關楚耀一同接受記者訪問，二人笑言今次都算係情侶檔，兼且佢哋有份主演嘅劇集《特技人》又大結局，關楚耀笑言現實與戲都見到Kelly都有啲混淆，好似重返去年拍緊戲嘅時候咁，Kelly接住話：「感覺好甜美，希望可以keep住呢個情侶檔，可以接多啲job，有多啲機會。」
關楚耀話，喺後台嘅時候，好多人都同佢哋玩，影相時仲笑佢哋幾襯！佢即講笑話：「如果我哋結婚，記得早啲到！」今次佢亦好開心獲何國鉦邀請行騷，笑指要向Kelly請教，話佢係舞台上前輩喎！完騷後佢哋亦會會合《特》劇嘅演員一齊睇大結局，問到會唔會有慶功，佢就話可能會㗎！
(蘋果日報)
