41歲嘅陳展鵬情歸28歲、2016年落選港姐單文柔(Phoebe)，起初展鵬同定欣班fans都難以接受，不停喺單文柔嘅社交網上留言攻擊，話佢係壞女人、好唔襯。
不過時間耐咗，煎Pang同單文柔呢pair愈睇愈順眼，早前更以情侶檔姿態一齊出活動搵真銀，甚有夫唱婦隨feel。
日前《蘋果》讀者Fion透過「爆相爆片」，表示日前下午3點左右喺倫敦有過百年歷史嘅Borough Market見到陳展鵬同單文柔，同行仲有一名穿黑色外套嘅女仔。單文柔曾經去過英國升讀倫敦藝術大學倫敦時尚學院，今次重遊舊地，相信黑衫女仔都係單文柔嘅朋友，趁機將男友介紹俾對方認識。
陳展鵬同單文柔衣著好相襯，頸上都戴住一條大頸巾保暖。Fion話﹕「佢哋望落都幾sweet，因陳展鵬會喺food stalls前面餵女朋友食嘢。佢哋都買咗好多嘢食，例如有好多新鮮雜菇煮嘅飯，之後又行去其他food stores買燒香腸、芝士、烤肉等，佢地後來仲有返去買生蠔，全部都係買一份，然後share。」
讀者話佢哋連俾錢都好有默契﹕「佢地一齊數錢，跟住就由男仔負責俾。」而身邊嘅朋友都好識做，間唔中會行遠少少，俾機會佢哋二人世界。
而前度緋聞女友胡定欣上月初突然unfollow陳展鵬(煎Pang)嘅ig賬戶，定欣話係「好個人嘅事」唔想解釋太多。但明眼人一睇，都覺得係同單文柔「介入」有關，搞到定欣心已死。
(蘋果日報)
