「無綫男神」余德丞（Dickson）早前踢波暈倒，幸經過一番搶救與治療，最終平安無事。Dickson今日喺ig公布，佢出院喇！佢仲發咗長文多謝身邊嘅人：「生命無 take 2 ，今次咁好彩有多一次機會，我一定會好好珍惜。」
全文如下：
我出院啦 🎉 🎉 🎉
感謝瑪麗醫院既醫生同護士們，見住你地早更完又夜更，又一大早巡房，又每日24小時留意住我既病情，真係辛苦你地！
感謝我既屋企人，每日擔心我病情既變化，又驚我唔知有咩需要，仲要每日頻頻撲撲幫我準備三餐。
感謝我公司，我經理人同一班好同事，成日擔心我會鑽牛角尖亂咁唸，一得閒就開解我。
感謝我既朋友，知我一個人悶，一有空檔就嚟陪我傾計，仲要買埋生果糖水俾我食。
感謝每一位關心我既你地同支持我既 fans，係唔同既社交平台都見到有好多問候我既訊息。雖然我未能夠一一回覆，不過我絕對感受到你地既心意。
不過坦白講，原來連續咁多日面對住一樣既三面牆，加埋打唔開既窗，感覺真係好難受！所以我都希望今次之後，我既身體會生生性性，爭一口氣，唔好再令大家擔心。
醫生話短期之內唔可以做運動住，相信都會係我最唔習慣既。生命無 take 2 ，今次咁好彩有多一次機會，我一定會好好珍惜。俾啲時間，等我休養多一陣，好快我就會重新出發💪🏼 #我只想身體健康 #回家最好不過 #第二生命#comebackstronger#happybirthdaytome #hk #hkig #instadaily#yuts
(on.cc東網)
