楊張新悅、Cara G.、陳嘉容、樂隊Mr.成員Tom(杜志烜)與太太何思諺及唐寧等，今日齊到灣仔會出席《Redress設計大賽2018》總決賽時裝表演。
楊張新悅於7月7日第四度做媽媽，為老公楊哲安誕下孻女「小雲」Lola，坐完月後，上月尾趁暑假完結前，就同老公及三個囡囡去咗岩里度假。
今日就獨自到會展出席活動，收晒身嘅張新悅更大騷長腿，佢話細女都出咗世兩個月，今日接受紥肚療程，佢話：「但真係好辛苦，因為一紥肚就要紥8至10個鐘，紥肚時一係要企，一係就要瞓，行動不便，但就唔會影響到湊女，紥肚過程中都可以餵奶。依家已經有啲一條龍嘅服務，包括催乳、紥肚、子宮修復等，呢個療程真係好好，之前生三個小朋友，都冇呢個享受，今次嘅復原過程真係好好。」
雖然見佢已經明顯收身，但張新悅就話自己仍然未收晒身，手腳仲有贅肉，佢亦都冇刻意去磅下自己嘅體重，只會留意自己能唔能夠着番之前嘅衫，不過今日就着新衫，舊衫依然未試。另外，張新悅亦大讚細女好易湊，平時喺屋企聽到聲都要扭計出廳見佢哋，問到三個家姐鍾唔鍾意細妹？佢話：「佢哋好鍾意，成日爭住要抱(細妹)。」
(蘋果日報)
