貝安琪（Ankie）、梁小冰同趙式芝等，噚晚喺演藝學院欣賞音樂劇《Beyond the Barricade》，小冰同老公陳嘉輝、囝囝一家三口到場，但老公同個仔堅持唔影相，提到老公好多劇拍，小冰話：「佢入咗無綫5年，不斷有劇出，奈何我冇乜睇，反而小朋友就好捧daddy場，個仔先至係佢嘅忠實fans，佢演技好，我唔使睇都ok啦。」相反，嘉輝之前就睇晒小冰有份演嘅《導火新聞線》，仲讚佢演得「衰」。
小冰冇睇晒老公嘅演出，但原來佢又好仰慕老公，佢話：「佢有對台詞過目不忘嘅特異功能，我服咗佢，我要用3日時間先可以記到，佢真係好勁！喺屋企會朗讀台詞，18年前同佢合作演《梁山伯與祝英台》，啲對白超多，但係佢超快已經記到，佢可以用我煮一餐飯嘅時間，記晒幾頁台詞，我就要用3日。」
小冰仲話囝囝遺傳嘉煇嘅「特異功能」，默書成績好好，佢話：「佢默書好高分，老公負責個仔嘅所有科目補習，最近喺facebook見到好多家長因為開學，搞到失眠，我就冇太擔心，全權交畀老公，學校冇名次，所以都冇咁大壓力，暑假我哋就去咗幾次旅行放鬆。阿仔一動一靜，佢升六年班，鋼琴準備考八級，係遺傳咗daddy，另外一樣就係跳舞，佢跳hip hop，呢個就係遺傳咗我，不過亦都有遺傳咗我有少懶，鍾意瞓晏覺同埋玩到癲。」
(蘋果日報)
