藝人陸永同太太Reina一向非常恩愛，平時都經常出雙入對，不過呢日嚟到二人結婚7周年嘅紀念日，陸永一早準備咗一大紮紅玫瑰打算氹老婆。
點知Reina竟然寧願瞓覺都唔理老公，唔通佢哋鬧咗交？其實係因為Reina全日冇停過！
身為好老公嘅陸永當然冇怪佢，仲喺社交網寫上愛的宣言多謝老婆：「今朝一早佢車個女返學，跟住接放學，再車第二個女返學，再接放學，再車返屋企煮晚飯畀佢哋食……我收工返嚟，佢已經攰到瞓死咗了，辛苦你了。結婚七周年快樂，我愛你。」
嘩！Sweet到呢…Reina今朝瞓醒起身後都覺得好冧，佢晒相兼留言：「陪我一齊早起湊女，陪我一齊食早餐，陪我hea住打機等女放學，就算冇花我都覺得好浪漫…#所有時候精力已畀兩個女耗盡 #慶唔慶祝已經唔重要 #瞓飽緊要 #七週（周）年快樂 #904＠6wing_fama」
(on.cc東網)
