超蓮話爸爸仲未知道呢個喜訊，因為佢想帶埋去畀佢睇，而問到媽媽三太陳婉珍滿唔滿意，超蓮就話。。。
賭王何鴻燊千金何超蓮早排幫屋企人打理一間澳洲嘅酒店，仲好威水咁得獎，噚晚佢喺尖沙嘴攞獎，超蓮當然盛裝出席，連耳環都係媽咪幫佢揀，超蓮仲話呢個獎項係國際性獎項，又指呢間佢打理嘅酒店就好似佢嘅BB咁。
問到媽媽三太陳婉珍對超蓮嘅成績滿唔滿意，超蓮就話：「係媽咪嘅成績，我交功課咋，我係攞咗媽咪嘅感覺去經營，成間酒店以白色為主。」超蓮話o依家唔使成日去澳洲，大約3個月就會飛過去一次，而每星期都會用電話開會。
問到爸爸知道佢得獎未，超蓮就話未知，因為想攞住個獎去畀佢睇。
超蓮就話o依家除咗呢間酒店同自己嘅牛肉麵生意，都冇乜點做其他嘢，同埋超蓮想搞慈善，之後仲想搞埋甜品生意，因為自己好鍾意食，到時自己應該會落場。不過就因為成日都要食，所以都要keep住減肥。
(蘋果日報)
