模特兒郭穎兒（Celia K.）上月底誕下第二位小公主Lia，但當Celia接Lia出院時，發現佢面上有一條2.5cm長嘅血痕，姑娘仲答佢係BB自己用指甲整親，但Celia覺得BB天生嘅指甲係軟嘅，點會整到咁粗咁深嘅傷口？呢件事亦令Celia情緒低落。
事隔十幾日，今日Celia喺社交網上載Lia影嘅初生BB相，相中嘅Lia臉上滑嘟嘟，似乎已經好番。
事後Celia接受電話訪問，心情亦明顯好轉：「BB好番好多，甩咗焦，但仲有個疤印，我估佢唔會留疤啩？（心情好番？）好番少少，因為見佢好番啲。（老公安慰你？）佢都係講門面說話啦，佢話好快冇事㗎啦，其實佢都心痛，不過佢知道再唔開心都冇意義，佢冇好似女人咁受賀爾蒙影響，會諗得清晰啲。」
問到仲有冇嬲醫院嘅處事方法？Celia就話：「好啲，我唔希望發生喺其他BB身上，醫院嗰邊話三星期後再畀個答覆我，佢哋改口話唔係100%肯定係BB自己整親，因為我問過有經驗嘅姑娘同搵醫生睇過，佢哋都話指甲未必整到，所以醫院話再了解吓。」Celia又呻依家好肥，雖然個靚樣冇點變，但個身就肥到豬咁，佢自爆佗B時重達150磅，生完輕咗20磅，希望可以瘦番30磅，依家佢會專心坐月，希望兩個月內減得番。
(on.cc)
